Staðsetning og leiðarlýsing 

Heimilisfang hússins er Ringnesveien 609, 3536 Noresund.
Húsið stendur við vatnið Krøderen nálægt kauptúninu Noresund. Þangað er um það bil 1 ½ klst. akstur frá Oslo eða um 90 km. Akið E18 að Sandvika og þaðan er beygt inn á E16 til Hønefoss, þegar komið er framhjá Hønefoss er beygt inn á veg 7 og ekið eftir honum til Noresund. Í Noresund fylgið þið skiltum til Norefjell og beygið út af vegi 7 til vinstri, akið yfir brúna og meðfram vatninu, ekki beygja eins og verið sé að fara upp á fjall. Þessum vegi er fylgt í ca 10 mínútur þar til komið er að Íslendingahúsinu sem er hvítt, reisulegt og fallegt gamalt hús á hægri hönd.

 


Húsið og umhverfið

Sveitasæla og fögur náttúra einkenna umhverfi hússins og er margt að skoða á svæðinu. Stærð og umhverfi hússins gerir það sérstaklega  aðlaðandi fyrir fjölskyldur og hópa allt árið. Að sumarlagi er t.d. hægt að fara í gönguferðir um nálæg fjöll eða bátsferðir á vatninu og fínn 18 holu golfvöllur er í aðeins um fimm mínútna akstursfjarlægð.  Hægt er að fara með gamalli járnbrautarlest frá Krødern til Vikersund, fara í hestaferðir, heimsækja bjarndýragarð ofl.   Við mælum með að skoða www.visitnorefjell.com  fyrir frekari upplýsingar um svæðið.

Hið þekkta skíðasvæði Norefjell er nánast í göngufæri við húsið, frekari upplýsingar um skíðasvæðið er hægt að finna á www.norefjell.com.

 

  • Á fyrstu hæð er anddyri með fatahengi, stór matsalur, stór stofa, vel búið eldhús með tveimur eldavélum, tveimur ísskápum (annar með frysti) og uppþvottavél.
  • Á annari hæð eru svefnpláss fyrir alls 33: Tvö fjölskylduherbergi fyrir 4, í þeim eru hjónarúm og koja. Eitt minna herbergi með koju fyrir 3 og tveir svefnsalir með kojum, annar með svefnplássum fyrir 10 en hinn 12. Eitt barnarimlarúm er í húsinu og lítið mál að taka með dýnur eða vindsængur fyrir börnin því nóg er gólfplássið. Einnig er eitt salerni á hæðinni.
  • Í kjallaranum er stór arinstofa með bluetooth hátalara, þurrkaðstaða, tvö salerni, gufubað og tvær sturtur.
  • Sængur, koddar og sængurföt fylgja ekki og eru ekki til staðar í húsinu.
    Klósettpappír og sápur fylgja ekki en viskastykki og tuskur eru í húsinu.
    Þvottavél er í kjallara.